Rexhepi: Sistemi i kanalizimit në Kumanovë i vjetruar, kryetari i Komunës merret me projekte 3D

Kryetari i Partisë Alternativa dega në Kumanovë, Nagri Rexhepi ka reaguar pas reshjeve të rrëmbyeshme të ujit në Kumanovë, transmeton Almakos.


Ky është reagimi i tij i plotë:

Sistemi i vjetruar dhe i mbingarkuar i kanalizimit dhe ujrave atmosferike në komunën e Kumanovës nuk i përballon rreshjet e shiut!

Këto ditë në zona të caktuara, kryesisht të banuara me shqiptarë, në qytetin e Kumanovës u dëshmua se sistemi i kanalizimit dhe ujrave atmosferike është i stërvjetruar dhe mbingarkuar, si dhe i ndërtuar jashtë standardeve adekuate për tu përballur me rreshjet atmosferike.

Është bërë e zakonshme që pas çdo shiu të vrullshëm në këto zona uji të nxjerrë në sipërfaqe mbetjet e kanalizimeve, sidomos ujërat fekale dhe duke bërë dëme të konsiderueshme nëpër shtëpitë dhe bizneset përreth, si dhe duke rrezikuar edhe shëndetin e qytetarëve sepse në raste të tilla përhapen edhe sëmundje ngjitëse.

A duhet fajsuar Zotin që po bie shi kaq vrullshëm, apo autoritetet lokale komunale që me vite të tëra nuk investojnë në këto zona në përmirësimin e sistemit të drenazhimit dhe kanalizimit sipas standardeve moderne dhe sipas nevojës nëpër ato lagje në mënyrë që të bëhet zgjidhje e qëndrueshme dhe afatgjate e këtij problemi.

Si një qytetar i shqetësuar më lindin pyetjet: A nuk e kanë ditur ata që këto linja të kanalizimit janë të vjetra, më të vjetra se vetë Maqedonia e Veriut, sepse janë linja të projektuara dhe ndërtuara nga sistemi i kaluar? Kush duhet marrë përgjegjësinë për këto paaftësi të autoriteteve komunale? Ku mbeten premtimet e para katër viteve kur ua morën votat qytetarëve? A do të shkojnë sërish në këto lagje me premtimin se mandatin tjetër do tua zgjidhin problemin?

Autoritetet qeverisëse komunale nuk duhen të merren me projektime tredimenzionale joshëse të fushatave zgjedhore por ti rreken sa më shpejt dhe seriozisht problemit. Është mirë që urgjentisht të bëjnë studime në nivel ekspertësh dhe duke pas parasysh ndryshimet në numrin e banorëve, ndryshimet infrastrukturore, ndërtimet, e sidomos ndërtimet e larta të bëhet planifikimi infrastrukturor i nevojshëm dhe adekuat i kanalizimit dhe drenazhimit që i përballon rreshjet e tilla sikur ato të ditëve të fundit. Për në të ardhmen të parashihet buxhet i posaçëm që në këto zona të ndërtohet rrjet i ri i kanalizimeve. Gjithashtu të shtohen ekipe profesionale për mirëmbajtjen e këtij rrjeti dhe ekipe mobile që të jenë të gatshme çdo herë të dalin në terren dhe tu ndihmojnë qytetarëve.